Muskulu omohioideo
Muskulu omohioideo | |
---|---|
![]() ![]() | |
Xehetasunak | |
Honen parte | Infrahyoid muscles (en) ![]() |
Jatorria | omoplatoa |
Insertzioa | body of hyoid bone (en) ![]() greater horn (en) ![]() |
Arteria | Goiko tiroide arteriaren adar infrahioideoa Lepoko zeharreko arteriaren azaleko lepoko arteria Mihi arteriaren adar suprahioideoa Beheko tiroide arteria |
Nerbioa | Lepoko euskarria |
Identifikadoreak | |
Latinez | m. omohyoideus |
TA | A04.2.04.003 |
FMA | 13342 |
Terminologia anatomikoa |
![](http://upload.wikimedia.org/wikipedia/commons/thumb/3/37/Musculi_colli_omohyoideus.svg/220px-Musculi_colli_omohyoideus.svg.png)
Muskulu omohioideoa —omoplatohioideoa edo eskapulohioideoa ere deitua— eskapularen goiko ertzetik hioide hezurrera luzatzen den muskulu edo gihar zapal, luze eta mehe bat da. Muskulu digastrikoa da eta bere erdialdean tendoi zilindriko bat dago bi sabelak bereiziz. Goiko sabela muskulu infrahioideoetatik albokoena da, esternotiroideo eta tiroihioideo muskuluren alboan dagoelako.
Lotuneak
Beheko sabela eskapularen goiko ertzeko muxarradura korakoideoaren barnealdera lotzen da. Ondoren barrurantz eta aurrerantz jarraitzen du lepoko pakete baskulonerbiotsuaren azalaldetik igaroko delarik eta zain jugularraren gainean tarteko tendoia osatzen du. Tarteko tendoiaren ondoren goiko sabela agertuko da eta honek goranzko norabidea hartuko du. Goiko sabela hioide hezurraren kanpoko aldera eta honen adar handira lotuko da, esternokleidohioideoaren kanpoaldean.
Erlazioak
Gihar honen eskapulako lotunea trapezio muskuluak estaltzen du. Eskapularen gaineko eremutik pasatzean, omohioideoaren aurreko aurpegia lepauztaiarekin eta muskulu subklabioarekin erlazionatzen da eta ondoren bere gainetik soilik aponeurosia eta azala egongo dira. Ondoren, aurreko aurpegi hori esternokleidomastoideoaren sakonaldetik igarotzen da eta gurutzatu ondoren berriz azalekoa bihurtzen da.
Muskulu omohioideoaren atal sakona muskulu zerradun nagusiarekin erlazionatzen da bere jatorrian. Ondoren eskaleno muskuluarekin, plexu brakialarekin eta lepoko pakete baskulonerbiotsuarekin (barneko jugular, karotida komun eta nerbio bagoz osatua) erlazionatuko da. Azkenik, muskuluaren atal bertikala tirohioideo eta esternotiroideo muskuluek banatuko dute tiroide guruinetik eta faringetik.
Muskulu omohioideoaren beheko sabelak lepoko atzeko hirukia banatzen du garondo hirukian (goiko hirukia ere deitua) eta lepauztaipeko hirukian (beheko hirukia ere deitua). Muskuluaren goiko sabelak berriz, lepoko aurreko hirukia banatzen du karotida-hirukian (goiko hirukia) eta muskulu-hirukian (beheko hirukia).[1]
Ekintza
Hioide hezurra jaitsarazteaz gain, inspirazioan lepoko zain zirkulazioa errazten du lepoko erdiko aponeurosia tinkatuz.
Inerbazioa
Muskulu omohioideoa hipoglosoaren euskarriak inerbatzen du; C1, C2 eta C3 nerbioek osatzen dutena. Hala ere, goiko sabela hipoglosoaren euskarriaren goiko erroak bakarrik inerbatzen du, C1 nerbioaren zuntzak bakarrik dituenak.
Irrigazioa
Irrigazio arteriala jasotzen du goiko tiroide arteriaren arteria infrahioideotik, lepoko zeharreko arteriaren lepoko azaleko arteriatik, mihi arteriaren adar suprahoideotik eta enbor tirozerbikaleko beheko tiroide arteriatik.
Irudiak
Erreferentziak
Kanpo estekak
Datuak: Q1049279
Multimedia: Omohyoid muscles / Q1049279